జయశంకర్ భూపాలపల్లి: భూపాలపల్లి పట్టణంలోని ప్రధాన రహదారులపై ఏర్పాటు చేసిన కొత్త ఎల్ఈడీ లైట్లు ఆకర్షణీయంగా కనిపిస్తున్నాయి. రాత్రి వేళల్లో వీధి దీపాలు కాషాయం, తెలుపు, ఆకుపచ్చ రంగుల్లో మెరిసిపోతూ అందరి దృష్టిని ఆకర్షిస్తున్నాయి. అయితే, భూపాలపల్లి ఎల్ఈడీ లైట్లు – కాంగ్రెస్ పార్టీ జెండా రంగులను పోలి ఉందనే అభిప్రాయం చాలా మందిలో అవుతున్నాయి. ప్రజా నిధులతో అమలు చేసిన ఈ ప్రాజెక్టు సహజ సుందరీకరణలో భాగమా? లేక రాజకీయ ప్రతీకగా మారిందా? అన్న ప్రశ్నలు స్థానికుల్లో చర్చనీయాంశమయ్యాయి.
ప్రజా డబ్బుతో పార్టీ ప్రచారమా?
పట్టణ ప్రజలు ప్రాథమికంగా ఈ ప్రాజెక్టును స్వాగతించినప్పటికీ, కాలక్రమేణా వీధి దీపాల రంగులపై సందేహాలు తలెత్తాయి. ఒక దుకాణదారుడు మాట్లాడుతూ..లైట్లు బాగున్నాయి, కానీ రంగులు కాంగ్రెస్ జెండా రంగుల్లా ఉన్నాయి. ఇది ప్రభుత్వ నిధులతో జరిగితే, ఏ పార్టీకి అనుకూలంగా ఉండకూడదు అని అన్నారు. ప్రజా ధనంతో చేపడుతున్న అభివృద్ధి పనులు రాజకీయ తటస్థతను పాటించాలి. లేని పక్షంలో అది ప్రచారం రూపం దాల్చినట్టే అవుతుంది.
ఎప్పుడు చట్టవ్యతిరేకం అవుతుంది?
ఎన్నికల కమిషన్ జారీ చేసిన మోడల్ కోడ్ ఆఫ్ కండక్ట్ (MCC) ప్రకారం, ఎన్నికల సమయంలో ప్రజా నిధులను ఏ రాజకీయ పార్టీకి అనుకూలంగా ఉపయోగించడం నిషేధం. అయితే ఎన్నికల కాలం కాకపోయినా, ఈ తరహా చర్యలు ప్రజా నైతిక విలువలకు వ్యతిరేకం అని నిపుణులు చెబుతున్నారు. ఒక ఆర్టీఐ కార్యకర్త మాట్లాడుతూ..ప్రభుత్వ నిధులతో ఎలాంటి పార్టీ రంగులు వాడినా అది తప్పే. ప్రజా ఆస్తి రాజకీయ పతాకం కావద్దు.” అన్నారు.
ఇతర రాష్ట్రాల్లో కూడా ఇలాంటి ఉదాహరణలు:
ఇలాంటి వివాదాలు కేవలం తెలంగాణలోనే కాదు, ఇతర రాష్ట్రాల్లో కూడా తరచుగా ఎదురవుతున్నాయి. ఆంధ్రప్రదేశ్‌లో వైఎస్ఆర్‌సీపీ ప్రభుత్వ కాలంలో గ్రామ కార్యాలయాలు నీలం-తెలుపు రంగుల్లో రంగవేసి విమర్శలు అనేక ఎదుర్కొన్నాయి. ఉత్తరప్రదేశ్‌లో భారతీయ జనతా పార్టీ పాలనలో, కాషాయం రంగు ప్రభుత్వ భవనాలకు వాడడం విమర్శలపాలు అయ్యింది. పశ్చిమ బెంగాల్‌లో తృణమూల్ రంగులు ప్రభుత్వ ప్రాజెక్టుల్లో కనిపించాయి. ఇందువల్ల, ఇది కేవలం కాంగ్రెస్‌పైనే కాదు ప్రతీ పార్టీ అధికారం లో ఉన్నప్పుడు ప్రజా ప్రాజెక్టులను రాజకీయ గుర్తులుగా మార్చే ధోరణి గా మారింది.
జాతీయ పతాకమా? పార్టీ జెండామా?
మున్సిపల్ అధికారులు మాత్రం ఇది దేశభక్తిని సూచించే రంగులు అని అంటున్నారు.
ఒక స్థానిక ప్రతినిధి మాట్లాడుతూ..ఇది స్వాతంత్ర్య దినోత్సవం సందర్భంలో దేశ జెండా రంగులను ఆధారంగా తీసుకుని చేసిన అలంకరణ మాత్రమే. ఏ పార్టీ రంగు కాదు.” అన్నారు. కానీ ప్రజలు మాత్రం వేరే కోణంలో చూస్తున్నారు. రంగులు జాతీయ పతాకంలో ఉన్నవే అయినా, ఆ ఆకృతి, అమరిక మాత్రం కాంగ్రెస్ జెండాను గుర్తు చేస్తుంది” అని ఒక ఉపాధ్యాయుడు వ్యాఖ్యానించారు.
ఆర్టీఐ కార్యకర్తలు:
ఈ ప్రాజెక్టు వివరాలు బహిర్గతం కావాలంటూ కొంతమంది ఆర్టీఐ కార్యకర్తలు దరఖాస్తులు సిద్ధం చేస్తున్నారు. వారు తెలుసుకోవాలనుకుంటున్న అంశాలు:
1. ఈ లైటింగ్ ప్రాజెక్టు ఏ శాఖ ద్వారా ఆమోదం పొందింది?
2. మొత్తం వ్యయం ఎంత? ఎవరు టెండర్ పొందారు?
3. రంగుల ఎంపికకు డిజైన్ కమిటీ ఉందా?
4. ప్రజా అభిప్రాయ సేకరణ జరిగిందా? ఈ ప్రశ్నలకు సమాధానం లభిస్తే, రాజకీయ ప్రభావం ఉందా లేదా అన్నది స్పష్టమవుతుంది.
నిపుణుల అభిప్రాయం:
ప్రభుత్వ ప్రాజెక్టులు తటస్థంగా ఉండాలి.ఒక పట్టణ నిర్మాణ నిపుణుడు వ్యాఖ్యానిస్తూ..ప్రజా ప్రాజెక్టులు ప్రజల కోసం, దేశం కోసం. రాజకీయ పార్టీ కోసం కాదు. రంగులు, ఆకృతులు కూడా ఒక సందేశం ఇస్తాయి. అందుకే ప్రభుత్వ నిర్మాణాలు తటస్థ రంగుల్లో ఉండాలన్నారు.
పౌరుల అభిప్రాయం..రెండు వైపులా వాదనలు
భూపాలపల్లి ప్రజలలో అభిప్రాయ భేదాలు స్పష్టంగా కన్పిస్తున్నాయి. ఒక వృద్ధుడు మాట్లాడుతూ..పట్టణం అందంగా ఉంది, కానీ ప్రభుత్వానికి పార్టీ రంగులు అవసరమా? ఈ విభిన్న అభిప్రాయాలు సౌందర్యం వర్సెస్ రాజకీయ చైతన్యం అనే చర్చను రేకెత్తిస్తున్నాయి.
చట్టపరంగా ఈ విషయంలో ప్రజలకు కొన్ని అవకాశాలు ఉన్నాయి:
1. జిల్లా కలెక్టర్ లేదా మున్సిపల్ కమిషనర్‌కు ఫిర్యాదు చేయడం.
2. ఆర్టీఐ ద్వారా సమాచారం పొందడం.
3. హైకోర్టులో పబ్లిక్ ఇంటరెస్ట్ లిటిగేషన్ (PIL) దాఖలు చేయడం.
4. ఎన్నికల కమిషన్‌కు ఫిర్యాదు చేయడం (ఎన్నికల సమయం అయితే).
ఇది కేవలం పార్టీపై ఆరోపణ కాదు ..ప్రమాదం ప్రభుత్వ తటస్థత కోల్పోవడమే.
ప్రభుత్వ ప్రకటనల మార్గదర్శకాలు ఏమంటున్నాయి,భారత ప్రభుత్వం జారీ చేసిన పబ్లిక్ కమ్యూనికేషన్ మార్గదర్శకాలు ప్రకారం:
ప్రజా నిధులతో చేసే ప్రదర్శనల్లో పార్టీ చిహ్నాలు, రంగులు, నాయకుల ఫోటోలు వాడకూడదు.
ఏ శాఖచే అమలవుతుందో స్పష్టంగా ప్రస్తావించాలి.
ప్రభుత్వం పౌరప్రయోజనాల కోసం పని చేస్తున్నదన్న భావన కలిగించాలి, పార్టీ ప్రచారం అనిపించకూడదు.
ఇక ఈ ప్రాజెక్టు ఈ మార్గదర్శకాలను అనుసరించిందా లేదా అన్నది అధికారులు వెల్లడించాలి.
రాజకీయ విశ్లేషణ: అభివృద్ధి vs ప్రచారం:
ప్రతీ ప్రభుత్వం తన పాలనలో కనిపించే గుర్తులు ఉంచడానికి ప్రయత్నిస్తుంది. రంగులు, లోగోలు, స్లోగన్లు. కానీ ప్రజాస్వామ్యంలో ప్రభుత్వం అంటే ప్రజలు, పార్టీ కాదు. భూపాలపల్లి జిల్లాలో కాంగ్రెస్ ప్రభావం పెరుగుతున్న సమయంలో ఈ రంగుల అమరిక రాజకీయంగా సున్నితమైనదిగా మారింది.
ఆర్టీఐ కార్యకర్తలు, పౌరసంఘాలు, జర్నలిస్టుల డిమాండ్:
ఈ లైట్ల ప్రాజెక్టు వివరాలు వెబ్‌సైట్‌లో బహిర్గతం చేయండి. ప్రజలు సందేహం పడాల్సిన అవసరం లేదు.
స్పష్టత ఉంటే ప్రజలు నమ్మకం పెంచుకుంటారు. లేదంటే అందమైన రోడ్డే వివాదాస్పద చిహ్నంగా మిగిలిపోతుంది. ప్రజా ధనం ప్రజల కోసమే ఉండాలి
భూపాలపల్లి రోడ్లపై మెరుస్తున్న ఎల్ఈడీ లైట్లు పట్టణానికి కొత్త రూపం ఇచ్చాయి. అయితే, అదే లైట్లు ఇప్పుడు ప్రజా ధనం రాజకీయ రంగుల్లో మసకబారుతోందా? అన్న ప్రశ్నను లేవనెత్తుతున్నాయి.
ప్రజాస్వామ్యంలో ప్రజా నిధులు ప్రచారానికి కాదు, ప్రజా సేవకు ఉపయోగపడాలి. ఈ సందేహానికి సమాధానం ఇవ్వాల్సింది ప్రభుత్వమే, పారదర్శకతతో, పత్రాల ఆధారంగా, ప్రజల ముందే.
https://bhoopalapally.telangana.gov.in/
By Veeramusti Sathish
M.A. (Journalism & Mass Communication), M.A. (Political Science)
Independent Digital Journalist & RTI Activist | Founder – Prathipaksham TV
READ MORE:
Telangana Faces Severe Water Crisis:Veeramusti Sathish
Telangana Information Commission Warns Tekumatla Police